Foto Budi Maryono
Dening HANDRY TM
wis tambah tuwa, noi
aja mungkret ati, biyen
playumu isih katon rikat,
aku tansah kepencut marang
perawan sing mlayune kebat
pancen tambah tuwa, noi
nanging ora kurang rasa
kangenku marang sliramu
sliramu kayadene kayu sawo,
lan aku lembaran godhonge sing tansah katon ijo
menawa suk pepisahan
tak pilih kuwi ana ing pinggiran laut gedhe
kanggo pangeling-elinge awake dhewe
nanging aku durung kepingin lunga
durung wayahe mahargya
pepisahan ing dina saiki
Semarang, 23 Juli 2021.
Ninggal Panggung
Dening HANDRY TM
nggendring kejer playuku nglungani
panggung sing gedhe banget kuwi
mbokmenawa sikil isih keciliken
nganggo sepatu sing dipundhutake ibu
saengga ora duwe wani
njoget lan gegemboran ana
ing panggung sing jembare
kaya kekarepane ibu
kaya-kaya kepingin ngadoh
nalika slompret keprungu nyriwing
ditindih swara serak para biduan,
lan senar gitar sing kaya nggegaruk-
ati
mbrabak mripatku mirsani ibu
ngadeg ing tengah ara-ara menungsa
ana ngarep panggung gedhe kuwi
Semarang, 2021.
